ఇంధన వినియోగంలో సంయమనం పాటించాలి: ప్రధాని మోడీ పిలుపు
పశ్చిమ ఆసియాలో నెలకొన్న యుద్ధ సంక్షోభం దృష్ట్యా పెట్రోలియం ఉత్పత్తులను పొదుపుగా, సంయమనంతో వాడాల్సిన అవసరం ఉందని ప్రధానమంత్రి నరేంద్ర మోడీ పిలుపునిచ్చారు. ఆదివారం హైదరాబాద్లోని హెచ్ఐసీసీలో జరిగిన కార్యక్రమంలో ఆయన పాల్గొన్నారు. ఈ సందర్భంగా తెలంగాణలో సుమారు రూ. 9,400 కోట్ల విలువైన వివిధ అభివృద్ధి పనులకు ప్రధాని వర్చువల్గా శంకుస్థాపనలు, ప్రారంభోత్సవాలు చేశారు.
ప్రపంచవ్యాప్తంగా నెలకొన్న ఇంధన సంక్షోభంపై ప్రధాని ఆందోళన వ్యక్తం చేశారు. దిగుమతి చేసుకునే పెట్రోలియం ఉత్పత్తులను అవసరానికి మేరకే వాడాలి. దీనివల్ల విదేశీ మారక ద్రవ్యం ఆదా అవ్వడమే కాకుండా, యుద్ధాల వల్ల కలిగే ప్రతికూల ప్రభావం నుంచి దేశాన్ని కాపాడుకోవచ్చు అని ఆయన పేర్కొన్నారు. గత కొన్నేళ్లుగా భారత్ సౌరశక్తిలో ప్రపంచంలోనే అగ్రగామిగా ఎదుగుతోందని, పెట్రోల్లో ఇథనాల్ మిశ్రమం విషయంలోనూ అపూర్వమైన పురోగతి సాధించామని గుర్తుచేశారు. గ్యాస్ కనెక్షన్ల విస్తరణ, పైప్డ్ గ్యాస్ సరఫరా, సీఎన్జీ వినియోగంపై ప్రభుత్వం ప్రత్యేక దృష్టి సారించిందని తెలిపారు.
రాజకీయాలకు అతీతంగా అభివృద్ధి
తెలంగాణ ముఖ్యమంత్రి రేవంత్ రెడ్డి చేసిన "అభివృద్ధిలో రాజకీయం ఉండకూడదు" అనే వ్యాఖ్యలను ప్రధాని స్వాగతించారు. రేవంత్ జీ.. ఇది వింటున్నారా?’ అని నవ్వుతూ వ్యాఖ్యానించారు. నేను కూడా అభివృద్ధి విషయంలో రాజకీయం చేయను. కేంద్రం గత పదేళ్లలో గుజరాత్కు ఎంత ఇచ్చిందో, మీకు కూడా అంతే ఇచ్చేందుకు నేను సిద్ధం. కానీ నా వద్ద ఉన్న సమాచారం ప్రకారం, అలా చేస్తే మీకు ఇప్పుడు అందుతున్న నిధులు సగం అయిపోతాయి. మీరు అనుకున్న లక్ష్యాలను చేరుకోలేరు. అందుకే కేంద్రంతో కలిసి ప్రయాణించండి అని ప్రధాని సూచించారు. ప్రజాస్వామ్యంలో రాష్ట్రాల్లో వేర్వేరు పార్టీల ప్రభుత్వాలు ఉండటం తప్పు కాదని, అయితే రాష్ట్రాల అభివృద్ధి జరిగితేనే దేశాభివృద్ధి సాధ్యమని ఆయన నొక్కి చెప్పారు.
గత 11 ఏళ్లలో తెలంగాణలో జాతీయ రహదారుల నెట్వర్క్ రెట్టింపు అయ్యిందని ప్రధాని తెలిపారు. గత యూపీఏ ప్రభుత్వంపై విమర్శలు చేస్తూ.. ఉమ్మడి ఆంధ్రప్రదేశ్లో రైల్వే బడ్జెట్ రూ. 1,000 కోట్ల లోపే ఉండేదని, కానీ నేడు కేవలం తెలంగాణకే రూ. 5,500 కోట్లు కేటాయిస్తున్నామని చెప్పారు. ప్రస్తుతం తెలంగాణలో సుమారు రూ. 50,000 కోట్ల విలువైన రైల్వే ప్రాజెక్టులు కొనసాగుతున్నాయని వెల్లడించారు. పారిశ్రామికీకరణ ద్వారా తెలంగాణను తయారీ రంగంగా మార్చడమే తమ లక్ష్యమని ప్రధాని చెప్పారు. ఉత్పత్తి ఆధారిత ప్రోత్సాహక పథకం ద్వారా దేశీయ తయారీని పెంచి, దిగుమతులను తగ్గించే దిశగా అడుగులు వేస్తున్నామని తెలిపారు. ఈ ప్రాజెక్టుల వల్ల తెలంగాణలో వేలాది మంది యువతకు ఉద్యోగ అవకాశాలు లభిస్తాయని ఆయన ఆశాభావం వ్యక్తం చేశారు.
బెంగాల్ విజయం తెలంగాణకు స్ఫూర్తిదాయకం
పశ్చిమ బెంగాల్లో బీజేపీ సాధించిన చారిత్రాత్మక విజయంపై ప్రధాని హర్షం వ్యక్తం చేశారు. బెంగాల్లో తొలిసారిగా బీజేపీ ముఖ్యమంత్రి ప్రమాణ స్వీకార వేడుకలో పాల్గొన్న ప్రధాని, అక్కడ లభించిన భారీ మెజారిటీ ప్రజల ఆశీర్వాదాలకు నిదర్శనమని పేర్కొన్నారు. ఆ విజయం నింపిన ఉత్సాహం ప్రస్తుతం తెలంగాణలోని ప్రతి బీజేపీ కార్యకర్తలోనూ స్పష్టంగా కనిపిస్తోందని ఆయన కొనియాడారు. దేశం నలుమూలలా బీజేపీకి ఆదరణ పెరుగుతోందని, ప్రజలు పార్టీ 'అభివృద్ధి నమూనా'ను పదే పదే ఆదరిస్తున్నారని ప్రధాని ధీమా వ్యక్తం చేశారు. బెంగాల్ ఫలితాల స్ఫూర్తితో తెలంగాణలోనూ నూతనోత్తేజం ఉరకలెత్తుతోందని ఆయన ఆకాంక్షించారు.
ముఖ్యమంత్రి రేవంత్ రెడ్డి విజ్ఞప్తి
అంతకుముందు ముఖ్యమంత్రి రేవంత్ రెడ్డి మాట్లాడుతూ.. మెట్రో రైలు విస్తరణ, 'ఫ్యూచర్ సిటీ' ప్రాజెక్ట్, మూసీ పునరుజ్జీవనానికి కేంద్రం సహకరించాలని కోరారు. తెలంగాణ అభివృద్ధి ప్రతిపాదనలను సమీక్షించేందుకు ప్రధాని రెండు గంటల సమయం కేటాయించాలని విన్నవించారు. కేంద్రం నిర్దేశించిన 'వికసిత భారత్ 2047' లక్ష్యానికి అనుగుణంగా 'తెలంగాణ రైజింగ్ 2047' విజన్ను ప్రకటించామని, రాష్ట్ర ఆర్థిక వ్యవస్థను 3 ట్రిలియన్ డాలర్లకు చేర్చడమే తమ లక్ష్యమని రేవంత్ రెడ్డి పేర్కొన్నారు. దేశవ్యాప్తంగా జాతీయ రహదారుల అభివృద్ధికి సుమారు రూ.1.75 లక్షల కోట్ల పెట్టుబడులు పెట్టినట్లు పేర్కొన్నారు.
ప్రధాని ప్రారంభించిన కీలక ప్రాజెక్టులు
• హైదరాబాద్-పనాజీ ఎకనామిక్ కారిడార్లో భాగంగా గుడెబెల్లూరు నుంచి మహబూబ్నగర్ వరకు ఎన్ హెచ్-167 నాలుగు వరుసల విస్తరణకు శంకుస్థాపన. (వ్యయం రూ.3,175 కోట్లు)
• సంగారెడ్డి జిల్లా జహీరాబాద్ పారిశ్రామిక ప్రాంతం, వరంగల్లో రూ.1,700 కోట్ల వ్యయంతో పీఎం మిత్రా పార్క్ (కాకతీయ మెగా టెక్స్టైల్ పార్క్) ప్రారంభం. ఇది దేశంలోనే మొట్టమొదటి పూర్తిస్థాయి ఫంక్షనల్ పీఎం మిత్రా పార్క్.
• కాజీపేట-విజయవాడ మల్టీ ట్రాకింగ్ ప్రాజెక్ట్, కాజీపేట రైల్ అండర్ రైల్ బైపాస్ ప్రారంభం.
• హైదరాబాద్లో గ్రీన్ ఫీల్డ్ పీఓఎల్ టెర్మినల్ ప్రారంభం.
ఈ కార్యక్రమంలో తెలంగాణ గవర్నర్ శివప్రతాప్ శుక్లా, కేంద్ర మంత్రులు జి. కిషన్ రెడ్డి, బండి సంజయ్ కుమార్ ఇతర ప్రముఖులు పాల్గొన్నారు. తెలంగాణ ప్రజల కలలను సాకారం చేసేందుకు కేంద్రం మరింత వేగంతో పనిచేస్తుందని ప్రధాని హామీ ఇచ్చారు.